Owesifazane waphambuka

Ngikhohlisiwe.

Ngigwetshwe kuze kube phakade

Kodwa ngikhohlisiwe.

Mina, siqu sami, nginguSiqalekiso.

Ngihamba umhlaba nje, ngiyisono

Mina, muntu owesifazane.

Ngoba ngalandela emva kwakho

Ngoba ngibunjwe emva kwakho

Ngaphutha phambi kwakho,

Awukhohlisiwe wena,

Awuphambukile wena.

Ngikhohlisiwe.

Ngigwetshwe kuze kube phakade

Kodwa ngikhohlisiwe.

Akusho lutho ukuthi awusiye uAdam.

Akusho lutho ukuthi angisiye uEva.

Okubalulekile ukuthi

Mina, siqu sami, nginguSiqalekiso.

Ukuba umuntu owesifazane,

Ukuba umuntu owesimame

Kuyisiqalekiso sami

Kanye nesono sami.

Konakele ngami.

Owami umlomo

awufundisi,

awukhulumi.

Eyami inqondo

ayiqondile

ayiqondisi

ayiqondeki.

Ngikhohlisiwe.

Ngigwetshwe kuze kube phakade

Kodwa ngikhohlisiwe.

Ngiqanjwe

unomaqhinga

unomkhuba

uPhambukile kuze kube phakade

Kodwa ngikhohlisiwe.